မုံရွာ ဖေဖော်ဝါရီ ၂၃
၂၀၂၂-ခုနှစ်၊ စစ်ကိုင်းတိုင်းဒေသကြီး ဝန်ကြီးချုပ်ဖလား ခရိုင်ပေါင်းစုံ အသက်(၁၇) နှစ်အောက် အမျိုးသားဘောလုံးပြိုင်ပွဲ ဖွင့်ပွဲအခမ်းအနားကို ဖေဖော်ဝါရီလ(၂၂)ရက်၊ မွန်းလွဲပိုင်းတွင် မုံရွာမြို့၊ ပြည်သူ့အားကစားကွင်းတွင် ကျင်းပရာဖွင့်ပွဲအခမ်းအနားသို့ တိုင်းဒေသကြီးဝန်ကြီးချုပ် ဦးမြတ်ကျော်၊ တိုင်းဒေသကြီးတရားသူကြီးချုပ်၊ တိုင်းဒေသကြီးအစိုးရအဖွဲ့ဝင်ဝန်ကြီးများ၊ တိုင်းဒေသကြီး/ ခရိုင်/ မြို့နယ်အဆင့် ဌာနဆိုင်ရာများနှင့် ဝန်ထမ်းများ၊ အသင်း အုပ်ချုပ်သူများ၊ ပြိုင်ပွဲဝင်အားကစားသများ တက်ရောက်ကြသည်။
ရှေးဦးစွာ တိုင်းဒေသကြီးဝန်ကြီးချုပ်ဦးမြတ်ကျော်က နိုင်ငံတော်အနေဖြင့် မြန်မာ့အားကစားအဆင့်အတန်းတိုးတက်မြင့်မားရေးကို အမျိုးသားရေးတာဝန်တစ်ရပ်အနေဖြင့် အကောင်အထည် ဖော်ဆောင်ရွက်လျှက်ရှိပါကြောင်း၊ တိုင်းဒေသကြီးနှင့်ပြည်နယ်ဘောလုံးပြိုင်ပွဲများကို (၁၉၅၂)ခုနှစ်မှစ၍ ကျင်းပခဲ့ပြီး လက်ရှိမြန်မာ့လက်ရွေးစင်အသင်းကို အင်အားဖြည့်နိုင်ရန်နှင့် အလားအလာရှိသော သွေးသစ်လူငယ်ဘောလုံး အားကစားသမားများ ပေါ်ထွက်ရရှိစေရေးအတွက် သက်ထမ်းအလိုက်ပြိုင်ပွဲများအဖြစ် တိုင်းဒေသကြီးနှင့် ပြည်နယ်အသက်(၁၇)နှစ်အောက် အမျိုးသားဘောလုံပြိုင်ပွဲကို ကျင်းပပြုလုပ်ရခြင်း ဖြစ်ပါကြောင်း၊ ယခုကျင်းပမည့် ခရိုင်ပေါင်းစုံ အသက်(၁၇)နှစ်အောက် ဘောလုံးပြိုင်ပွဲကနေလည်း အရည်အချင်းပြည့်ဝတဲ့ တိုင်းလက်ရွေးစင်အားကစားသမားများကို စစ်ကိုင်းတိုင်းဒေသကြီး လက်ရွေးစင်အဖြစ်ရွေးချယ်ပြီး နေပြည်တော်တွင်ကျင်းပမဲ့ တိုင်းဒေသကြီးနှင့်ပြည်နယ် အသက်(၁၇)နှစ်အောက် အမျိုးသား ဘောလုံးပြိုင်ပွဲကို ဝင်ရောက်ယှဉ်ပြိုင်သွားမှာဖြစ်ပါကြောင်း ပြောကြားပြီး ခရိုင်ပေါင်းစုံ အသက် (၁၇)နှစ်အောက် အမျိုးသားဘောလုံး ပြိုင်ပွဲအား ဖွင့်လှစ်ပေးခဲ့သည်။
ထို့နောက် စစ်ကြောင်းမှူးမှ ဦးဆောင်၍ ပြိုင်ပွဲဝင်အသင်းများမှ အားကစားသစ္စာ အဓိဌာန် ရွတ်ဆိုပြီး တိုင်းဒေသကြီး ဝန်ကြီးချုပ်နှင့်တာဝန်ရှိသူများက ပြိုင်ပွဲဝင်အားကစားသမားများအား လိုက်လံနှုတ်ဆက်အားပေးကာ ပြိုင်ပွဲဝင်အသင်းများမှ စစ်ကြောင်းပုံစံဖြင့် ကွင်းအတွင်းမှ ပြန်လည်ထွက်ခွာကြသည်။
ယင်းနောက် တိုင်းဒေသကြီး ဝန်ကြီးချုပ် ဦးမြတ်ကျော်နှင့်တာဝန်ရှိသူများက အဖွင့်ပွဲစဉ်အဖြစ် ခန္တီးခရိုင်ဘောလုံးအသင်းနှင့် စစ်ကိုင်းခရိုင်ဘောလုံးအသင်းတို့ ယှဉ်ပြိုင်ကစားနေမှုအား ကြည့်ရှု့အားပေးပြီး ခန္တီးခရိုင်အသင်းမှ စစ်ကိုင်းခရိုင်အသင်းအား (၄)ဂိုး၊ (၁)ဂိုးဖြင့် အနိုင်ရရှိသွားသည်။
ဆက်လက်ပြီး တိုင်းဒေသကြီး ဝန်ကြီးချုပ် ဦးမြတ်ကျော်က အဖွင့်ပွဲစဉ်တွင် ခန္တီးခရိုင် ဘောလုံးအသင်းမှ အကောင်းဆုံးကစားသမား မောင်ချစ်ရင်ထူး ကျောနံပါတ်(၇)အား Daily Man Of Match ဂုဏ်ပြုဆုတံဆိပ်အား ပေးအပ်ချီးမြှင့်ခဲ့ကြောင်း သိရသည်။
အဆိုပါ ၂၀၂၁-ခုနှစ်၊ စစ်ကိုင်းတိုင်းဒေသကြီး ဝန်ကြီးချုပ်ဖလား ခရိုင်ပေါင်းစုံ အသက်(၁၇)နှစ်အောက် အမျိုးသားဘောလုံးပြိုင်ပွဲသို့ စစ်ကိုင်းတိုင်းဒေသကြီးအတွင်းရှိ ခရိုင်(၈)ခရိုင်မှ အားကစားသမား (၁၄၄)ဦး ဝင်ရောက်ယှဉ်ပြိုင်ကြပြီး အုပ်စု(၂)အုပ်စုခွဲကာ မုံရွာမြို့ရှိ ပြည်သူ့အားကစားကွင်းတွင် ဖေဖော်ဝါရီလ(၂၂)ရက်နေ့မှ မတ်လ(၃)ရက်နေ့အထိ ကျင်းပသွားမည် ဖြစ်ကြောင်း သတင်းရရှိသည်။


